Chille stanno ‘e casa vicino vicino

Chille so’ crisciute balcone e balcone.

Isso s’è appicciato

comm’ ‘o ffuoco d’ ‘e lampare.

Essa è fredda e muta

comm’ ‘a luna mmiez’ ‘o mare.

Ma ll’ammore – piscatore,

c’ ‘o lanzaturo – l’ha fatte appezza’.

Ohè!… Comme so’ belle sti ‘nnammuratielle!

So’ figlie ‘o mare sti marenarielle:

‘na biundulella maliziusella,

nu brunettiello friccecariello.

Seh! Seh!

Marenariello chesta lenza toia

nun ‘a stennere saie pecchè?…

Chella cu l’acqua soia

s’adda cocere, siente a mme!

‘Nterra Margellina se dice… se dice…

ca nu core ‘e preta se coce… se coce…

Ninno è chino ‘e pepe

p’ ‘a speranza sta vullenno,

Nenna tene ‘ncapo

nu penziero e nun s’arrenne.

Ma ll’ammore – sti dduie core

cu nu suspiro – l’ha fatte accusta’!

Ohè!… Comme so’ belle sti ‘nnammuratielle!

So’ figlie ‘o mare sti marenarielle:

na biundulella maliziusella,

nu brunettiello friccicariello.

Seh! Seh!

Marenariello chesta lenza toia

nun ‘a stennere saie pecchè?…

Chella cu l’acqua soia

s’adda cocere, siente a mme!

……………..

Na biundulella maliziusella,

nu brunettiello friccicariello.

Seh! Seh”

Marenariello chesta rezza toia,

curre… ménela… siente a mme:

chella cu ‘e mmane soie

l’ha cusuta pe ce cadè.

Cè caduta dint’ ‘a rezza…

dint’ ‘a rezza… ‘mbraccio a tte!

Piedigrotta “Giba” 1958

Incisa da Maria Paris su dischi “Vis Radio”