Stasera
vulesse pruvà ancora,
n’ata vota ancora,
‘a stessa gioia ca pruvavo
tantu tiempo fa,
quanno ancora
tutte quante ‘nzieme
aspettavamo ‘a mezzanotte,
pe brindà a ll’anno nuovo.
E po’ vulesse vedé ancora
a papà,
assettato ncopp ‘a pultrona, appicciarse na sigaretta
e calmo calmo
cummentà ‘o discorso
d’o Presidente
cu Carmine,
‘o figlio suojo prediletto.
Sarebbe nu miraculo,
nu suonno troppo bello,
sentì ancora dint’e recchie
‘a voce lloro.
Ma sì succedesse ancora,
stavota è sicuro
ca nun me distraesse – comme facevo quann’ero piccerella –
ma me sucasse ogni parola
comm’a na caramella doce,
o comm’a nu struffolo
‘e chilli bbuone e sapurite,
ca sulo mammà sapeva fà.
Antonella Carullo, Nustalgia
ANTONELLA CARULLO 