Sta trasenno Natale.

Già p’’e strate

saglie n’addore’e ‘ncienzo e mandarino.

‘E zampugnare songo già calate

da ‘e terre d’’o Ciliento e d’Avellino.

Nu guaglione s’accatta nu Bammino…

e cchiù astrignute vanno ‘e nnammurate.

Ma tu chist’anno nun me staie vicino:

pe’ na buscia ce simmo appiccecate.

Trase Natale.

Stanno appriparate

già tutt’’e bancarelle cu ‘e biancale;

‘e pputeche se songhe ‘ntulettate…

Io sulo stongo triste comm’a cche!

Pecchè, chi sa, chist’anno “Buon Natale”

tu a quanta gente ‘o ddice…

’a fore ‘e me

Giuseppe Carullo, Nustalgia