Era ‘o cchiù prepotente ‘e dint’’o Buvero,
Ciccio Bellaria, nu jastemmatore.
Ogni parola na jastemma, n’essere senza core, manisco e ghiucatore.
Se vulette nzurà quase pe’ sfizio,
‘nce capitaie na povera figliola senza nisciuno.
E ce ne deva tuosseco! Nun ‘a faceva dì meza parola.
Po’ venette nu figlio; ma che strazio
pe chillu criaturo! Era cecato.
Diceva ‘a gente: “Embè, Ciccio s’’o mmereta!
A chillu ‘nfame Dio l’ha casticato!”
Ciccio cchiù ghiastemmava p’’a disgrazia,
mentre ‘a mugliera, mamma sfurtunata,
purtava dint’’o core stu martirio…
… mmziez’’a gente pareva ‘Addulurata!
Spitale e ccure… medicine e mmiedeche…
Ma nun ce steva niente, niente’ a fa’.
Mentre ‘o guaglione cresceva, biondo e pallido,
povero figlio! Int’’all’oscurità.
Fuie poco tiempo fa, doppo ‘a na visita,
“s’adda operà!” – dicette ‘o prufessore.
‘A mamma la’ pe’ lla’ sentette ‘e nascere
‘a luce ‘e na speranza dint’’o core.
Iettero ‘o iuorno appriesso ‘o Policlinico.
Mentre Ciccio saglieve, steve pe’ ghiastemmà…
… ma po’ capuzziaie, e ‘int’’o silenzio
se muzzecaie ‘o musso, nun parlaie.
Era già pronta ‘a sala operatoria
e ‘o guagliunciello steva pronto già,
quanno ‘a mamma ‘o pruiette,
cu nu palpito ‘e fede, na fiùra:
– Tiè, a mmammà!
A ‘o piccerillo l’uocchie lle lucettero…
…. stennette ‘a mano e subbeto tuccaie
‘a fiurella d’’a Madonna ‘o Carmene…
– Ce veco!…’ a veco!… ‘a veco!… po’ strillaie.
Mò nun ghiastemma cchiù Ciccio Bellaria!
Mò cchiù ‘e quatto parole nun l’accocchie…
… e ‘o miercurì sta dint’’a Chiesa ‘o Carmene,
c’’o figlio mbraccio e ‘e llacreme ‘int’all’uocchie.
Giueppe Carullo, Le stagioni del poeta
ANTONELLA CARULLO 