Lacrime napulitane

Il 26 maggio 1942 moriva il grande Libero Bovio.

LACREME NAPULITANE

E’ Primmavera
o nun è Primmavera?
Nun se sente p’’e strade: “Bellu sciore…”
Chesta jurnata
scura cchiù d’’a sera
n’alba ‘e tristezza
ha miso dint’’o core.

Nun saglie a voce:
<E ffravule ‘e ciardino!>
‘O pianino nun sona:
<Quanta rose>
Pare ca tutto dorme
a ssuonno chino,
pare ca songhe ‘e neve tutt’’e ccose.

Comm’a na vota ‘ncopp’’addu “Pallino”,
nisciuna mano
‘e ccorde vò tentà,
‘a pusteggia
s’astipa ‘o mandulino,
ogge ‘e vvocche
nun sanno cchiù cantà.

Cchiù cupo e niro
è addeventato ‘o mare,
‘e vvarchette scuntente
nun so asciute.
A Pusilleco tutt’e marenare
se fanno ‘a Croce,
pallide e avvelute.

E chiagneno
‘e mmaeste d’’o Mercato,
chiagneno
‘e guappe ‘e vascio ‘a Sanità.
– Sanghe de ddiece!…
E’ muorto ‘on Liberato!
E mò ‘a Canzone
comme fa a campà?!

Giuseppe Carullo, Le stagioni del poeta