Felicità,
tristezza vestuta a ffesta.

Nu suono
‘e campana
sciùlia pe’ ll’aria
che pare ‘nfosa ‘e lacreme
(o…è?)

Ncopp”a strada
nu velo
‘e sole ‘nzeriuso.

L’indifferenza 
d”a gente
che vene, che va,
se ‘mbroglia
cu’ ‘e ciente
remmure
che s’accavallano
e se secutano
e perciano ‘a via.

E mmiez’a sti remmure
na fila d’orfanelle,
quase appartata,
‘ncopp”o marciappiere.

Dint”e passe
nu struscio ‘e caserma.
E dint’all’uocchie
nu capriccio ‘e bene
maie cunfessato,
comme si fosse nu peccato
desiderà na mamma!
Na mamma
ca nun è chella che tene
‘ncopp”o grigio pesante ‘e na suttana
nu viso giallo e asciutto,
pure… pure si porta ‘o nomme ‘e “madre”!

Malincunia.
Surriso vestuto ‘e lutto